Former ABS-CBN employees, ramdam pa rin ang pagiging Kapamilya

Hindi kaila sa publiko ang pagkalugi ng ABS-CBN network sa nakalipas na mga buwan. Maliban sa pandemyang COVID-19, direktang naramdaman ng Kapamilya network ang epekto ng pagkakapasara nila dulot ng kawalan ng prangkisa na ipinagkait sa kanila ng kongreso.

Isa nga sa epektong ito ay ang malawakang retrenchment ng mga empleyado ng kumpanya noong Agosto.

Ngunit sa kabila ng pagkalugi at shutdown ng network, hindi pa rin nakalimutan ng ABS-CBN na gumawa ng paraan upang iparamdam sa kanilang mga empleyado ang espiritu ng pagiging Kapamilya lalo na ngayong panahon ng Kapaskuhan. Kabilang na rin dito pati ang mga former employees nila.

Sa Twitter idinaan ni Janyx Regalo (@janyxregalo) ang pasasalamat sa ABS-CBN na hindi nakalimot na magbigay ng holiday surprise gift sa kanilang mga retrenched employees.

Umani ito ng papuri mula sa ilang netizens sa Twitter.

Kabilang sa mga nagkomento ang director-comedian na si John Lapus at ang ABS-CBN reporter na si Jeck Batallones.

Isa rin si Liah Moises (@leeeeyaaaah) sa mga retrenched employees na idinaan sa social media ang pasasalamat sa Kapamilya network. Nakakatawa aniya dahil sinasabing ang hindi magandang pagtrato ng ABS-CBN sa kanilang mga empleyado ang isa sa dahilan kung bakit hindi nai-renew ang prangkisa ng network. Subalit taliwas ito sa personal niyang nararanasan ngayon. Sa katunayan, maaga niyang natanggap ang kaniyang Christmas bonus at incentives kahit na noong August pa siya nawalan ng trabaho.

Isa rin si DJ Jhaiho sa nagpahayag ng pasasalamat sa ABS-CBN at nagsabing ibang klaseng magmahal ang network.

Ikinwento naman ni chxnqzn (@chxnqzn) ang kaniyang pasasalamat na may pumasok na cash gift sa kaniyang account kahit na hindi naman araw ng sweldo.

Isa rin si Alex Calleja (@alexcalleja1007) sa nagpasalamat na sa kabila ng mga pinagdadaanan ng ABS-CBN ay nagagwa pa rin nitong maging mapagbigay.

Ipinagmalaki naman ng ABS-CBN reporter na si Jervis Manahan (@JervisManahan) sa kabila nga ng pagpapasara ng network ay nagawa pa rin nitong mamahagi ng 14th month pay.

Ibinahagi naman ni Jon Montesa (@iMelAljon) ang screenshot ng kaniyang mensahe para sa kaniyang ina noong ipinaalam niya rito na huling araw na ng kaniyang trabaho sa ABS-CBN noong August 31. Kasunod ito ng screenshot ulit ng kaniyang message sa ina kung saan niya sinabing babalik na ulit siya ng trabaho sa ABS-CBN matapos ang mahigit tatlong buwan.

Umani ang tweet niyang ito ng positibong komento mula sa mga ABS-CBN supporters.

Maraming tagasuporta ng ABS-CBN ang nagsabing maaaring senyales na ito ng unti-unting pagbangon ng network mula sa pagkakapasara sa kanila ngayong taon.

Matatandaang tinutulan ng 70 congressmen ang francise renewal ng ABS-CBN, at ito ang ang naging dahilan ng pagpapatigil ng pag-ere ng network sa free TV.

Leave a Reply

Your email address will not be published. Required fields are marked *

error: Content is protected!